Shajahan Thazhakath

എന്താണ് രാഷ്ട്രീയം?എന്ങനെയാണ് രാഷ്ട്രീയത്തില്‍ പ്രവര്‍ത്തിക്കേണ്ടത്? രാഷ്ട്രീയം വെറുക്കപ്പെടേണ്ട ഒന്നാണോ? രാഷ്ട്രീയക്കാരെല്ലാം വെറുക്കപ്പെടേണ്ടവരാണോ? എന്താണ് രാഷ്ട്രീയപ്രവര്‍ത്തനം ? എന്താണ് നല്ല രാഷ്ട്രീയം ? അത് എങ്ങനെയായിരിക്കണം ? ആരാണ് നല്ല രാഷ്ട്രീയക്കാരന്‍ ? രാഷ്ട്രീയക്കാരന്‍ എങ്ങനെയായിരിക്കണം ? ഒരുപാടു ചോദ്യങ്ങള്‍. ഒറ്റ ഉത്തരം. രാഷ്ട്രീയം ഒരു രാജ്യത്ത് ജീവിക്കുന്ന ജനങ്ങളുടെ നല്ല ജീവിതത്തിനുപകരിക്കുന്ന സാഹചര്യങ്ങള്‍ സൃഷ്ടിക്കുന്നതിനുള്ള ഒരുപാധിയാണ്‌. അവരുടെ തൊഴില്‍, വിനോദം, വിശ്രമം, കുടുംബ ബന്ധങ്ങള്‍, സ്വത്തുവകകളുടെ സംരക്ഷണം എന്നിവയൊക്കെ ഉറപ്പു വരുത്തുന്നതായിരിക്കണം രാഷ്ട്രീയം. അത് എല്ലാ ജനങ്ങളെയും ഒരുപോലെ കാണുന്നതായിരിക്കണം. രാഷ്ട്രത്തിന്‍റെ ഭദ്രത കാത്തുസൂക്ഷിച്ച്‌ ജനങ്ങള്‍ക്ക്‌ ബാഹ്യ ഇടപെടലുകളില്‍ നിന്നു സംരക്ഷണം നല്കുന്നതായിരിക്കണംഎന്നാല്‍ നമ്മുടെ രാജ്യത്ത് രാഷ്ട്രീയം കൈകാര്യം ചെയ്യപ്പെടുന്നത് എങ്ങനെയാണ്? നമ്മുടെ രാജ്യത്തെ ജനങ്ങള്‍ക്കെല്ലാം മേല്‍പ്പറഞ്ഞ സൌകര്യങ്ങള്‍ ലഭിക്കുന്നുണ്ടോ ? അടിസ്ഥാന ജീവസന്ധാരണത്തിന് ആവശ്യമായ തൊഴിലും അതുവഴിയുള്ള വരുമാനവും എല്ലാവര്‍ക്കും ലഭിക്കുന്നുണ്ടോ? ഇല്ല എന്ന് നമുക്കെല്ലാവര്‍ക്കും അറിയാം. എന്തുകൊണ്ടിങ്ങനെ സംഭവിച്ചു? കഴിഞ്ഞ അറുപത്തിരണ്ടു വര്‍ഷമായി നാം രാഷ്ട്രനിര്‍മ്മാണം നടത്തിക്കൊണ്ടിരിക്കുകയാണ്. എന്നിട്ടും ഒരു വലിയ വിഭാഗം ജനങ്ങളുടെ അടിസ്ഥാന പ്രശ്നങ്ങള്‍ പോലും പരിഹരിക്കാന്‍ നമ്മുടെ രാജ്യം ഭരിച്ചവര്‍ക്കു കഴിഞ്ഞിട്ടില്ല. ഇത്തരം പ്രശ്നങ്ങള്‍ ഉന്നയിക്കുമ്പോള്‍ രാജ്യം ചില മേഖലകളില്‍ നേടിയ വികസനം എടുത്തു കാട്ടി അവര്‍ വിമര്‍ശകരുടെ കണ്ണില്‍ പൊടിയിടും. വിമാന ഇന്ധനത്തിന്റെ വില പല ഘട്ടങ്ങളായി അമ്പതു ശതമാനത്തോളം കുറച്ചവര്‍ പെട്രോള്‍, ഡീസല്‍, പാചക വാതകം എന്നിവയ്ക്ക് നാമമാത്രമായ കുറവ് മാത്രം വരുത്തി ജനങ്ങളെ സഹായിച്ചു? സ്വകാര്യ വിമാനക്കമ്പനികള്‍ക്ക് കൊള്ളലാഭം നേടാന്‍ ഇതു സഹായകമായി. കാരണം ഇന്ധനത്തിന്റെ വില ഭീമമായി കുറച്ചു കൊടുത്ത്തെന്കിലും യാത്രക്കൂലിയില്‍ യാതൊരു കുറവും കമ്പനികള്‍ വരുത്തിയില്ല. അതിന് സര്‍ക്കാര്‍ നിര്‍ബ്ബന്ധിച്ചുമില്ല. ഇങ്ങനെ കുമിഞ്ഞു കൂടിയ ലാഭത്തില്‍ കുറേയെങ്കിലും ഇപ്പോള്‍ നടക്കുന്ന പൊതുതെരഞ്ഞെടുപ്പിന്റെ ഫണ്ടിലേക്ക് ഭരണ കക്ഷിക്ക് ഒഴുക്കിക്കൊടുത്ത്തിട്ടുണ്ടാവണം. ഇങ്ങനെയാണ് നമ്മുടെ രാഷ്ട്രീയത്തിന്റെ പോക്ക്. വികസനം എന്നാല്‍ വന്‍കിടക്കാര്‍ക്ക് ലാഭം കൊയ്യാനുള്ള വഴികള്‍ ഉണ്ടാക്കിക്കൊടുക്കലാണ് എന്നും അതിന്റെ പങ്കു പറ്റി അതുപയോഗിച്ചു അടുത്ത തെരഞ്ഞെടുപ്പില്‍ അധികാരത്തില്‍ വരാനുള്ള വഴി തേടലാണ് എന്ന് ഇവര്‍ തെളിയിച്ചു തുടങ്ങിയിട്ട് എത്രയോ കാലമായി. മേല്‍പ്പറഞ്ഞത്‌ ചെറിയ ഒരു ഉദാഹരണം മാത്രം. ജനങ്ങളുടെ വോട്ടു വാങ്ങി അധികാരത്തില്‍ വരിക. ജനാഭിലാഷത്തെ പൂര്‍ണ്ണമായും നിരാകരിച്ചു കൊണ്ടു സ്വന്ത ഇഷ്ട പ്രകാരം ഭരിക്കുക. ഇത്തരം ഒരു വിഷമ വൃത്തത്തില്‍ കിടന്നു രാജ്യം കറങ്ങാന്‍ തുടങ്ങിയിട്ട് വര്‍ഷമേറെയായി. ഇതിന് ഒരു മാറ്റം വരേണ്ട കാലം കഴിഞ്ഞു . നാം ഓരോരുത്തരും നമ്മുടെ കടമ നിറവ്ഏറ്റിയില്ലെന്കില്‍ നമ്മുടെ രാജ്യത്തെ ജനങ്ങളുടെ ഭാവി ഇരുളടഞ്ഞതാവും.