Shajahan Thazhakath

ഇന്നലെ നാം രാഷ്ട്രീയത്തെ തെറ്റായി ഉപയോഗിക്കുന്നതിനെക്കുറിച്ച് ചര്‍ച്ച ചെയ്തു. രാഷ്ട്രീയം വ്യക്തിക്കോ, വ്യക്തികള്‍ക്കോ, ഒരു പ്രത്യേക സമുദായത്തിനൊ, ഗ്രൂപ്പിനോ, സ്വാധീന ശക്തിയുള്ളവര്‍ക്കോ വേണ്ടി ദുരുപയോഗം ചെയ്യുകയും അത് ഒരു മഹാ ഭൂരിപക്ഷത്തിന്റെ അവകാശങ്ങളെ ഹനിക്കുകയും ചെയ്യുമ്പോള്‍ രാഷ്ട്രീയവും അത് കൈകാര്യം ചെയ്യുന്നവരും ദുഷിക്കുന്നു. അങ്ങനെ രാഷ്ട്രീയത്തെക്കുറിച്ച് ജനങ്ങള്‍ക്ക്‌ അവജ്ഞ ഉണ്ടാകുന്നു. ആ അവജ്ഞ അത്രുപ്തിയായും മെല്ലെ മെല്ലെ സംഘര്‍ഷമായും വളരുന്നു. ഇപ്പോള്‍ ശ്രീലങ്കയില്‍ നടക്കുന്ന സംഘര്‍ഷം അങ്ങനെയൊരു അസംത്രുപ്തിയില്‍ നിന്നു വളര്‍ന്നു വന്നതാണ്. അവിടത്തെ സിംഹള ഭൂരിപക്ഷം തമിഴ് ന്യൂനപക്ഷത്തെ മാര്‍ജിനലൈസ് ചെയ്യാന്‍ തുടങ്ങിയപ്പോള്‍ തമിഴര്‍ ചെറുത്തുനില്‍പ്പ്‌ ആരംഭിച്ചു. അന്ന് അവര്‍ക്ക്‌ നേതൃത്വം നല്കാന്‍ ഒരു പ്രഭാകരന്‍ മുന്നിട്ടിറങ്ങി. പ്രഭാകരന്‍ വന്നില്ലെന്കില്‍ മറ്റൊരാള്‍ ആ സ്ഥാനത്ത് വരുമായിരുന്നു. അത് ചരിത്രത്തിന്റെ ഒരു അനിവാര്യതയാണ്. സംഭവാമി യുഗേ യുഗേ. അതിന് അവര്‍ സ്വീകരിച്ച മാര്‍ഗം ശരിയോ തെറ്റോ എന്നത് വേറെ കാര്യം. ഇപ്പോഴും എല്‍ ടി ടി ഇ യെ തുരത്താന്‍ എന്ന പേരില്‍ നടക്കുന്ന യുദ്ധവും ലക്‌ഷ്യം വെക്കുന്നത് സാധാരണ ജനങ്ങളെ തന്നെയാണെന്നു തെളിയിക്കുന്ന റിപ്പോര്‍ട്ടുകള്‍ വന്നു കഴിഞ്ഞു . ലക്ഷക്കണക്കിന്‌ തമിഴര്‍ ആവശ്യത്തിനു ഭക്ഷണവും വസ്ത്രവും മരുന്നും കിട്ടാതെ യുദ്ധഭൂമിയില്‍ ജീവിക്കുമോ മരിക്കുമോ എന്നറിയാതെ ഉഴറുന്നു. കൂടെ പല സിവിളിയന്മാരെയുംപ്രത്യേകിച്ചു ചെറുപ്പക്കാരെ സംശയത്തിന്റെ പേരില്‍ പട്ടാളക്കാര്‍ പീഡിപ്പിക്കുന്നതിന്റെ റിപ്പോര്‍ട്ടുകളും വന്നു കഴിഞ്ഞു . രാഷ്ട്രീയം തെറ്റായി ഉപയോഗിച്ചതിന്റെ ഏറ്റവും നല്ല ഉദാഹരണം. ഇതു എല്ലാ രാജ്യത്തും നടക്കുന്നു. ചില രാജ്യങ്ങള്‍ തങ്ങളുടെ നിലനില്പ്പിനെന്ന പേരില്‍ മറ്റു രാജ്യങ്ങളെ ആക്രമിക്കുന്നു. അവിടെ അധിനിവേശം നടത്തുന്നു. അവിടത്തെ ജനങ്ങളെ നിര്‍ബ്ബാധം കൊന്നൊടുക്കുന്നു. അല്ലെങ്കില്‍ ഉപരോധം ഏര്‍പ്പെടുത്തുന്നു. എല്ലാം മനുഷ്യന്‍ മനുഷ്യനെതിരെ നടത്തുന്ന ആക്രമണം. ഭൂമിയിലെ മറ്റൊരു ജീവിയും കാരണമില്ലാതെ മറ്റൊരു ജീവിയേയും കൊല്ലാറില്ല. ഇവിടെ മനുഷ്യന്‍ കാരണമില്ലാതെ സഹജീവികളെ കൊല്ലുന്നു. അത്ന് കാരണം ഉണ്ടാക്കുന്നു. ഭൂമിയില്‍ സംസ്കാരങ്ങള്‍ കെട്ടിപ്പടുത്ത മനുഷ്യന്‍. ഭാഷകളും സംസ്കാരങ്ങളും ഉണ്ടാക്കിയ മനുഷ്യന്‍. ശാസ്ത്രത്തില്‍ വിസ്മയം തീര്‍ത്ത മനുഷ്യന്‍. ഇപ്പോള്‍ അവന്‍ താന്‍ സൃഷ്ടിച്ച്ചതൊക്കെയും നശിപ്പിക്കാനുള്ള ശ്രമത്തിലാണ്. അതിനുള്ള ധാരാളം ആയുധങ്ങള്‍ അവന്‍ ശേഖരിച്ചിട്ടുണ്ട്. അവന്റെ കൂടുതല്‍ സമയവും ശ്രദ്ധയും അതിന് വേണ്ടി മാത്രമാണ് ചെലവഴിക്കപ്പെടുന്നത്‌. ഇതൊക്കെ ചെയ്യുന്നത് വിദ്യാഭ്യാസം ഇല്ലാത്തവരോ ബുദ്ധി കുറഞ്ഞവരോ അല്ല. ഭൂമിയില്‍ ഉള്ളതില്‍ ഏറ്റവും വലിയ ബുദ്ധിമാന്മാരാണ് ഇതൊക്കെ ചെയ്യുന്നത്. അത് തന്നെയാണ് ഏറ്റവും വലിയ വിരോധാഭാസം.